….. და ეს იყო საოცარი შეგრძნებების ნაკადი, იმიტომ რომ ქალთან ურთიერთობისას გრძნობ, რომ შენს პარტნიორს ყველა შენი საჭიროება ესმის; ყველა შენი შეგრძნების მიმართ არის ემპათიური; თქვენ რომანტიულ თავგადასავალთან ერთად აუცილებლად გაქვთ ამხანაგობა, ერთიანდებით ჩაგვრის წინააღმდეგ. ჩემთვის ეს იყო პოლიტიკური გაძლიერების უდიდესი გზა. როცა თავად აწყდები როგორი ამოვარდნილი ხარ ჰეტერონორმატიული, პატრიარქატული სივრციდან, გინდა ხმამაღლა იყვირო: - რომ შენ აქ ხარ! რომ შენ ქალი ხარ! რომ შენ გიყვარს ქალი! ქალი, რომელმაც ყველაზე კარგად იცის რა გჭირდება. ქალი, რომელიც არ გეკონკურენტება და არ ცდილობს სივრცეები წაგართვას. პირიქით, სურს რომ ყველა სივრცეში შენთან ერთად ინტეგრირდეს.
ჩემთვის ამ ურთიერთობის რეპრეზენტაცია თმის სამაგრია, რომელიც მარიამმა ლონდონიდან ჩამომიტანა. ჰო, უცნაური საჩუქარია ლონდონიდან, მაგრამ მთავარია ტექსტი : “ აი შენ პატარა თმის სამაგრები, სულ რომ ეძებ, ბევრი გექნება და ადვილად იპოვნი.” ეს ნიშნავს იმას, რომ ქალებმა ყოველთვის იციან, მთლიანობა იქმნება დეტალებით, რომლებიც კაცებისთვის ასეთი უმნიშვნელოა. ნიშნავს იმას, რომ კაცებს რომლებსაც საჯარო სივრცეებში აქვთ გლობალურ საკითხებზე საუბრის საშუალება - თუნდაც იმაზე როგორ იჩაგრება ქალი - ყოველთვის ავიწყდებათ, რომ ჰყავთ სახლში დედები, დები, ქალი პარტნიორები, შვილები და რატომღაც ვერ ხვდებიან თავიანთი თეორიების ლოკალურ პრაქტიკაში გადმოიტანას; ავიწყდებათ ის დეტალები, რომლებიც ჩვენ უამრავ რესურსს გვართმევს და იძულებულები ვხდებით ამ დეტალებზე ვილაპარაკოთ.
ქალებს არ სჭირდებათ მითითება, როცა თავს შეუძლოდ გრძნობ სადილი მოგიმზადონ, სახლი დაალაგონ და პასუხისმგებლობები აიღონ. ჩემი სიტყვები არ ასახავენ იმ გრძობას, რასაც მარიამის მიმართ განვიცდი, რადგან არ შემიძლია… საბოლოოდ მე და მარიამი ერთად აღარ ვართ და ეს ჩემთვის პრობლემა იყო არა მხოლოდ ემოციურ , სენტიმენტალურ დონეზე. თითქოს ეს იყო პოლიტიკურ განაცხადზე უარის თქმა, ლესბოსური სეპარაციის უარყოფა, რამაც ასმაგად მტკივნეული გახადა ეს დაშორება. უბრალოდ მინდა რომ მარიამმა იცოდეს, ეს იყო საუკეთესო ურთიერთობა, პოლიტიკური კომფორტის ზონა (ჩემთვის) და სოლიდარობის უდიდესი აქტი. ამიტომ მარიამი ვერასდროს იქნება ჩემი ყოფილი შეყვარებული, რომელთანაც ურთიერთბას გავწყვეტ! იმიტომ რომ ჩვენ ქალები ვართ და წინ დიდი, ერთობლივი ბრძოლა გველოდება!